የኤልዳድና የሙዳድ ታሪክ

✍ ዮሴፍ ኢትዮጵያ | አልፋና ዖሜጋ ዘተዋሕዶ

ዛሬ ደግሞ በታላቁ ጠያቂ ትምህርታችን የምንመለከተው በቅዱሳት መጻሕፍት ገጾች ውስጥ እንደ ተደበቀ ዕንቁ፣ ጥቂት ሰዎች ብቻ ምስጢሩን የሚያውቁት፣ ነገር ግን የመንፈስ ቅዱስን ልዕልናና የእግዚአብሔርን ምርጫ በድንቅ ሁኔታ የሚያሳየውን አስደማሚ ታሪክ ነው። ይህ የኤልዳድና የሙዳድ ታሪክ ነው። (ዘኍልቍ ምዕራፍ ፲፩)

(ክፍል ፰  ጠያቂ ትምህርት)

​.... እነሆ በዚያን ዘመን፣ የእስራኤል ሕዝብ በሲና በረሃ ውስጥ የነጻነት አስቸጋሪ ጉዞ ላይ ነበሩ። ሙሴ ብቻውን የሕዝቡን ጩኸትና የሥጋ ፍላጎት መሸከም ከብዶት እግዚአብሔርን ተማጸነ። እግዚአብሔርም፦ "ከሕዝቡ ሽማግሌዎች ሰባ ሰዎችን ሰብስብ... በላያቸውም መንፈሴን አወርዳለሁ፤ ሸክሙንም ከአንተ ጋር ይሸከማሉ" አለው።

እነሆ፣ የኤልዳድና የሙዳድ ታሪክ በዚህ ታላቅ መለኮታዊ ጥሪ መካከል የተከሰተ አስገራሚ ክስተት ነው።

ሙሴ የታዘዘውን አደረገ። የስልሳ ስምንት ሽማግሌዎችን ስም ዝርዝር ይዞ፣ ወደ መገናኛው ድንኳን ደጃፍ ሰበሰባቸው። የተቀሩት ሁለት ሰዎች፣ ኤልዳድ እና ሙዳድ ግን በዝርዝሩ ውስጥ ቢኖሩም፣ በድንኳኑ ደጃፍ አልተገኙም ነበር። እነርሱ በሰፈሩ ውስጥ፣ በየራሳቸው ድንኳን ቀርተው ነበር።

ድንገት! የእግዚአብሔር ክብር በደመና ወረደ። ሙሴ ላይ የነበረው መንፈስ፣ በድንኳኑ ደጃፍ በተሰበሰቡት በስልሳ ስምንቱ ሽማግሌዎች ላይ አረፈ። ሁሉም በአንድነት ትንቢት ተናገሩ፤ የእግዚአብሔርን ታላቅነት አወደሱ። ይህ ታላቅ ሰማያዊ ትዕይንት ነበር።

ነገር ግን ልንዳስሰው የፈለግነው ያልተጠበቀው ተአምር በሰፈር መካከል ተገለጠ፦

በዚሁ ቅጽበት፣ በሰፈሩ ውስጥ ሌላ ያልተጠበቀ ነገር እየተከናወነ ነበር። በድንኳኑ ደጃፍ ካልተገኙት ከሁለቱ ሰዎች ማለትም —ከኤልዳድና ከሙዳድ— ላይ መንፈስ ቅዱስ ወረደባቸው!

እነርሱ በሙሴ ፊት አልቆሙም፣ በካህናት አልተባረኩም፣ በተቀደሰው ሥፍራም አልነበሩም። ነገር ግን የእግዚአብሔር መንፈስ የቦታና የሥርዓት ገደብ የለውም። በየድንኳናቸው ሆነው፣ በሕዝቡ መካከል ትንቢት መናገር ጀመሩ። ቃላቸው እንደ እሳት ነደደ፤ ሕዝቡም ተደነቀ።

​

እዚህ ላይ የተከሰቱ ሁለት ሌላ ሰዎችን ተቃራኒ ባሕርይ እንመልከት አንድ ታላቅ መንፈሳዊ ቅናት የቀና ሰውና አንድ ደግሞ ታላቅ ትህትናን ያስተማረ ሰው፦ ኢያሱንና ሙሴን!

አንድ ወጣት እየሮጠ ወደ ሙሴ መጣ። "ጌታዬ ሙሴ ሆይ! ኤልዳድና ሙዳድ በሰፈር ውስጥ ትንቢት እየተናገሩ ነው!" ሲል ወሬውን አቀበለ።

በሙሴ አጠገብ የነበረው፣ ከልጅነቱ ጀምሮ አገልጋዩ የሆነው ኢያሱ (የነዌ ልጅ) ይህን ሲሰማ ቅናት አደረበት። ለሙሴ ክብር ተቆርቁሮ፦ "ጌታዬ ሙሴ ሆይ! ከልክላቸው እንጂ!" አለ። በኢያሱ እይታ፣ ከሙሴ እውቅና ውጪ፣ ከመደበኛው ሥርዓት ውጪ የሚደረግ የእግዚአብሔር ሥራ ተቀባይነት የለውም።

ሙሴ ግን፣ ያ ከምድር ሰዎች ሁሉ ይልቅ የዋህ የሆነው ሰው፣ ለዘመናት የሚዘልቅ ታላቅ መልስ ሰጠ፦

​"አንተ ስለ እኔ ትቀናለህን? የእግዚአብሔር ሕዝብ ሁሉ ነቢያት ቢሆኑ፣ እግዚአብሔርም መንፈሱን በላያቸው ቢያወርድ፣ ምነው በተደረገ!" (ዘኍልቍ 11፥29)

ሙሴ አልተቆጣም፣ አልከለከለም። እንዲያውም ምናለበት ሕዝቡ ሁሉ  "ሁሉም ነቢያት ቢሆኑ" ብሎ ተመኘ። ሙሴ የራሱን ክብር ሳይሆን፣ የእግዚአብሔርን ክብርና የሕዝቡን መቀደስ ነበር የፈለገው።

​የኤልዳድና የሙዳድ ታሪክ ለቤተክርስቲያንና ለአማኞች ብዙ ጥልቅ መልዕክቶች አሉት፦

የመንፈስ ቅዱስ ልዕልና፦ መንፈስ ቅዱስ በሰው በተበጀ ሥርዓት፣ ቦታ ወይም ጊዜ አይገደብም። በድንኳኑ ደጃፍ (በቤተመቅደስ) ብቻ ሳይሆን፣ በሰፈር (በተራው የሕይወት ሥፍራ) ውስጥ ለተዘጋጁ ልቦች ይወርዳል።

የእግዚአብሔር ምርጫ፦ ስማቸው በዝርዝር ውስጥ መኖሩ ብቻ ሳይሆን፣ እግዚአብሔር ልባቸውን አይቶ በየትኛውም ቦታ ሊጎበኛቸው እንደሚችል ያሳያል። ምናልባት እነርሱ "እኛ አንበቃም" ብለው በትሕትና ቀርተው ይሆናል፣ ነገር ግን ጸጋው የእግዚአብሔር ምርጫ ፈለጋቸው።

ከቅናት የጸዳ አመራር፦ የሙሴ ምላሽ ለእውነተኛ መንፈሳዊ አባቶችና መሪዎች ታላቅ ተምሳሌት ነው። እውነተኛ መሪ፣ ሌሎች ሲጸድቁና መንፈሳዊ ስጦታ ሲኖራቸው አይደነግጥም፤ ይደሰታል እንጂ።

​የዕለቱ የሕይወት መስተዋት፡ ክፍል ፰ ራስን የመፈተሻ ጥያቄዎች፦

​ይህን አጭር ግን ምስጢራዊ ታሪክ ስናነብ፣ ራሳችንን እንጠይቅ፦

መንፈስ ቅዱስን ወስነነዋል? ማለትም፦ የእግዚአብሔርን አሠራር በራሳችን ጠባብ ሥርዓትና ግንዛቤ ውስጥ ብቻ ለመወሰን እንሞክራለን? ከእኛ የተለየ አሠራር ስናይ እንደ ኢያሱ "ከልክላቸው" እንላለን?

በሰፈርህ (በዕለት ተዕለት ኑሮህና ውሎህ) ተዘጋጅተሃል? መንፈስ ቅዱስ በቤተክርስቲያን ወይም መንፈሳዊ በተባሉ ቦታዎች ብቻ ሳይሆን፣ በሥራ ቦታህ፣ በትምህርት ቤትህ ወይም በቤትህ ውስጥ ሊጎበኝህ ሲመጣ፣ ልብህ እንደ ኤልዳድና ሙዳድ ዝግጁ ነው?

የሙሴ ልብ አለህ? ሌሎች ሰዎች ከአንተ በላይ መንፈሳዊ ስጦታ ሲኖራቸው ወይም እግዚአብሔር ሲጠቀምባቸው፣ ትቀናለህ ወይስ "ሁሉም ነቢያት ቢሆኑ ምነው!" ብለህ ትደሰታለህ?

ኤልዳድና ሙዳድ፣ በሰፈር ውስጥ ዝቅ ባለው ስፍራ ተአምራቱን የገለጠው የበራው የመንፈስ ቅዱስ ችቦዎች ናቸው። አስተዋይ ልቦና ይስጠን! ቸር ይግጠመን!