5ቱ አእማደ ምስጢር ዋና የኦርቶዶክስ እምነት የሃይማኖታችን መሠረቶች

በስመ አብ ወወልድ ወመንፈስ ቅዱስ አሐዱ አምላክ አሜን።

የተወደዳችሁ የክርስቶስ ቤተሰቦችና የድንግል ማርያም ወዳጆች፤ እንደምን ሰነበታችሁ?

ቅድስት ቤተ ክርስቲያናችን ለልጆቿ የምታስተምረው የክርስትና አስተምህሮ በዘፈቀደ የቆመ ሳይሆን፣ ጥንካሬው የማይናወጥና መሠረቱ የጸና ነው። እነዚህ መሠረቶችም "አእማደ ምስጢር" (የምስጢር አምዶች) ይባላሉ። ቤት በአምድ እንደሚቆም ሁሉ፣ የክርስቲያን ሃይማኖትም በእነዚህ አምዶች ላይ ይጸናል።

እነዚህ አምስት የሃይማኖት መሠረቶች የሚከተሉት ናቸው፦

፩. ምስጢረ ሥላሴ

አምላካችን እግዚአብሔር በስም፣ በግብርና በአካል ሦስት ሲሆን፤ በባሕርይ፣ በሕልውናና በመለኮት ደግሞ አንድ መሆኑን የምናምንበት ጥልቅ ምስጢር ነው። አብ ወላጅ፣ ወልድ ተወላጅ፣ መንፈስ ቅዱስ ሠራጺ ሲሆኑ፤ በፈጣሪነታቸውና በጌትነታቸው ግን ልዩነት የሌላቸው አንድ አምላክ ናቸው።

"እንግዲህ ሂዱና አሕዛብን ሁሉ በአብ በወልድና በመንፈስ ቅዱስ ስም እያጠመቃችኋቸው... ደቀ መዛሙርት አድርጓቸው" (ማቴ. ፳፰፡፲፱)።

፪. ምስጢረ ሥጋዌ

ከሦስቱ አካላት አንዱ አካል ወልድ፣ ዓለምን ለማዳን ሲል ከእመቤታችን ከቅድስት ድንግል ማርያም ከሥጋዋ ሥጋ፣ ከነፍሷ ነፍስ ነስቶ ሰው የሆነበት ድንቅ ምስጢር ነው። መለኮትና ትስብእት (ሰውነት) ያለ መለያየት፣ ያለ መቀላቀልና ያለ መለወጥ ተዋሕደዋል። አምላክ ሰው ሆነ፤ ሰውም አምላክ ሆነ።

"ቃልም ሥጋ ሆነ፤ ጸጋንና እውነትንም ተመልቶ በእኛ አደረ" (ዮሐ. ፩፡፲፬)።

፫. ምስጢረ ጥምቀት

ከእግዚአብሔር ለመወለድና መንግሥቱን ለመውረስ የምንቀበለው የመጀመሪያው የጸጋ መዝገብ ነው። በውኃና በመንፈስ ቅዱስ ተጠምቀን የሥላሴ ልጅነትን የምናገኝበት፣ ከአዳም የወረስነውን የውርደት ሞት አውልቀን የምንጥልበት የድኅነት በር ነው።

"ሰው ከውኃና ከመንፈስ ካልተወለደ በቀር ወደ እግዚአብሔር መንግሥት ሊገባ አይችልም" (ዮሐ. ፫፡፭)።

፬. ምስጢረ ቁርባን

አማላካችን መድኃኒታችን ኢየሱስ ክርስቶስ ስለ እኛ በዕለተ ዓርብ የቆረሰውን ሥጋውንና ያፈሰሰውን ደሙን የምንቀበልበት ምስጢር ነው። ይህ አማናዊ መብልና መጠጥ ከፈጣሪያችን ጋር አንድ የሚያደርገንና የዘላለም ሕይወትን የሚያሰጥ ነው።

"ሥጋዬን የሚበላ ደሜንም የሚጠጣ በእኔ ይኖራል እኔም በእርሱ እኖራለሁ" (ዮሐ. ፮፡፶፮)።

፭. ምስጢረ ትንሣኤ ሙታን

ሰው ከሞተ በኋላ ዳግመኛ እንደሚነሣና የዘላለም ፍርድ እንደሚጠብቀው የምናምንበት ተስፋችን ነው። ጌታችን በክብር ሲመጣ ጻድቃን ለሕይወት፣ ኃጥአን ደግሞ እንደ ሥራቸው ለፍርድ ይነሣሉ። ይህ ለክርስቲያኖች የሞት ፍርሃትን የምናሸንፍበት ትልቅ ቃል ኪዳን ነው።

"እኔ ትንሣኤና ሕይወት ነኝ፤ የሚያምንብኝ ቢሞት እንኳ ይኖራል" (ዮሐ. ፲፩፡፳፭)።

ማጠቃለያ

እነዚህን አእማደ ምስጢር ጠንቅቆ ማወቅና ማመን ለነፍስ ድኅነት ወሳኝ ነው። እምነት ያለ ትምህርት፣ ትምህርትም ያለ ተግባር ሙሉ አይሆንም። እግዚአብሔር አምላክ በቅድስት ኦርቶዶክሳዊት ተዋሕዶ እምነታችን ያጽናን!

ወስብሐት ለእግዚአብሔር። ወለወላዲቱ ድንግል ወለመስቀሉ ክቡር። አሜን።